Am schennsde is Weihnachte ja fer die Kinner, maane Sie net aach?

Wenn isch an Heilischawend denk, da seh isch misch als klaaner Bub mit meiner klaane Schwesder zusamme vor de Wohnzimmerdier wadde, muggsmäusjeschdill, geschbannt wie en Fliddsebooche. Wann derfemer nei zum Christkindsche?

Des hat immer e klaa Ewischkeit gedauert, bis mer endlisch, endlisch enei durfde. Nehmlisch dann, wenn mer uff aamaa e ganz fei Glöggschergeläut geheert hat. Dann awwer nix wie enei ins Wohnzimmer! Da hat en große Weihnachtsbaam geschdanne, mit viele bunde Kuchele draa un silberne Schdern, golden Lamedda un brennende Käzze uff de Zweische. Un ganz owwe druff uff dem Weihnachtsbaam war des Gloggeschbiel. Ach, was hat des so schee geklunge! Mir klaane Döbbsch hawwe nadierlich noch gaanet gewusst, wie des scheene silbrische Gloggeläude endschdanne is. Schbeder hats uns de Babba un die Mamma erkleert. Die uffschdeischende Hitz von dene brennende Käzze hat en Drehkranz in Beweeschung geseddst, an dem klaane Klöbbelscher gehange hawwe. Die sinn bei der Drehung von dem Kranz an Glöggscher draageschdoße, un dadorsch is des Geläut zuschdand gekomme. Ach, war des schee! So ebbes vergisst mer sei ganz Lewe lang net.

E Weilsche schbeder hat de Babba sei Geisch genomme un die Mamma ihr Gidda. Dann hammer zusamme, schee mit ersder un zweider Schdimm, die aldehrwirdische Weihnachtslieder gesunge: O Tannebaam, Schdille Nacht, Sießer die Glogge nie klinge, Oh du Freelische, un wie se all heiße.

Un dann, viel schbeder, nachem Singe un Musiziern, dorfte mer die Geschenkpäggscher uffmache. Des war nadierlich en Rieseschbass fer uns Kinner, obwohl da gaanet viel drin war. Un was drinn gewese is, waan fast nur praggdische Sache. Wollene Schdrimb, von de Mamma geschdriggde Pullower, so Zeusch. Die Zeide waan schlescht, de Babba awweidslos, da musst jeder Fennisch dreimaa umgedreht wern.

Des warn scheene Weihnachde bei uns dehaam. Isch denk heut noch draa.

Die Geschischt von Maria un Josef un vom klaane Jesus im Kuhschdall von Bethlehem, die kenne Sie ja, nemm isch emaa aa. Die Geschischt geheert eifach zu unsere, wie säscht mer doch gleisch?, zu unsere Leidkuldur, wenn Se misch fraache. Un desweesche sollt jeder die Geschischt kenne, aach wenner mit de Kersch nix am Hut hat.

Isch selwer hab die Geschischt als klaaner Bub von meiner Omma väderlischerseids verzählt kriet. Mehr wie aamaa. Die Omma war asch fromm un is net nur Sonndaachs in die Kersch gange. Ihrn Mann, mein Obba, war kaan Kerschgänger. Er konnt aach gaanet gehe. Der war neemlisch Soldat im ersde Weltkriesch un is 1917 so bees verwund worn, dassem nach un nach erst de linke Fuß, dann de reschde Fuß, dann de linke Unnerschenkel, dann de reschde Unnerschenkel abgenomme worn is. Un so is des als weider gegange, bisser bloß noch en halwe Mensch war. Troddsdem hadder viel scheene Geschischdscher uff Laacher gehabt un hat oft gelacht. Isch habben asch lieb gehabt, de Obba Emil.

Besonners fromm isser awwer glaab isch net gewese. Dadefer sei Fraa, mei Omma, um so mehr. Un die hat sischer gewollt, dass isch genau so fromm wie sie wern deht. Deshalb hat se mer immer fuffzisch Fennisch gegewwe, wenn isch Sonndaachs brav in die Kersch gegange bin. Ob des peddagoogisch rischdisch war, dadriwwer will isch mer kaa Urdeil erlaube.

Jedenfalls hawwe die fuffzisch Fennisch meiner juuchendlisch Frömmischkeit en meschdische Schubbs gegewwe.

Awwer des nur newebei.

Von was hadde mers? Ach so. Vom Lukas seim Evangelium .

Also, die Omma hat mir klaanem Bub die Geschicht von de Geburt vom klaane Jesus in schdack vereifachder Form verzählt. Un isch muss saache, die Geschischt hat mer genau so gut gefalle wie die Geschischdscher von Hänsel un Gredel, Schneewiddsche un de siwwe Zwersche odder vom Rodkebbsche.

Wie isch greeßer worn bin, hawwe sisch da schon so mansche Fraache fer misch ergewwe. Der Josef war also net de rischdische Babba von dem klaane Jesus, mehr so e Aad Fleeschevadder. War jetz de rischdische Vadder de Heilische Geist? Odder Gott selwer? Uffgeweggde Kinner hawwe dademit schon einische Probbleeme. Isch will dademit net saache, dass isch perseenlisch besonners uffgeweggt war, awwer ganz bleed aach net. Obwohl die Omma als emaa gesacht hat isch wär en klaane Dummkobb.

Jedenfalls hat die Geschischt vom Schdall in Bethlehem fer misch damals schon einische Fraache uffgeworfe, fer die mei Omma kaa vellisch befriedischende Andworde parat gehabt hat.

Was mir aach net in de Kobb enei wollt, des waan die komische Geschenke von dene drei Keenische ausem Morscheland fer den klane Jesus. Gold, klar, des kann mer aach als Kind verschdeh. Mei Eldern un de Obba un die Omma hadde ja aach Ring aus Gold an de Finger. Awwer was soll mer mit Weihrauch un Mürre aafange, odder wie des Zeusch haaßt?

Egal. Je elder mer wird, desdo schenner wird die Geschischd ausem Lukas-Evangelium, aach wemmer mit de Kersch net so viel am Hut hat.

Mein Vadder hat bei uns dehaam die Roll vom Niggelees iwwernomme un sehr iwwerzeuschend geschbielt. Mir Kinner hawwe schonn e paar Jahrn annen geglaabt. Damals sinn die Niggelees ja aach nur im engsde Familljekreis uffgetrede. Net so wie heut, wo aam vor Weihnachde in de Kaufhäuser un uff de Gass alle Naaslang en Niggelees begeeschend.

Bei uns dehaam war de Niggelees so lang e Reschbeggdsperson, bis isch aanes Daachs in unserm Keller innere Kist mit Weihnachdssache owwedruff em Babba sein Niggeleesbart gesehe hab.